ხერხემალი ჩვენი სხეულის მთავარი ღერძია, რომელიც დიდ ყურადღებას იმსახურებს. მოსახლეობის ძალიან დიდ ნაწილს ცხოვრების რაღაც ეტაპზე, ერთხელ მაინც ჰქონია ტკივილები ზურგის არეში. არასწორი დატვირთვა, არასწორი ჯდომა და ფიზიკური აქტივობის არ ქონა, გავლენას ახდენს საყრდენ-მამოძრავებელი სისტემის მდგომარეობაზე, იწვევს ხერხემლის ოსტეოქონდროზს, კუნთების ტკივილს და დაჭიმულობის შეგრძნებას.
პრობლემა მასობრივია, მაგრამ არსებობს მარტივი მეთოდები, რომლებიც მსგავსი პრობლემების გაჩენის რისკს ამცირებს, გამოსავალი კი ყოველდღიურ ვარჯიშსა და მოძრაობაშია.
ამიტომ ისეირნეთ სუფთა ჰაერზე, ნუ იქნებით მთელი დღის მანძილზე მჯდომარე მდგომარეობაში. ყოველ 30 წუთში ადექით, იარეთ, თუნდაც თქვენს სამუშაო მაგიდასთან, ტელეფონზე საუბრისას შეგიძლიათ მეტი დრო დაუთმოთ სიარულს. ხერხემლის პრობლემების დიდი ნაწილი დაჭიმული კუნთებით არის გამოწვეული. ასეთ დროს, დაძაბულ მდგომარეობაში მყოფი კუნთები აწვება დისკს, რაც სტრესის დამატებითი წყაროა და იწვევს ხერხემლის პრობლემებს.
გთავაზობთ რამდენიმე მარტივ ვარჯიშს, რომელიც დაგეხმარებათ მოადუნოთ ზურგის კუნთები და განთავისუფლდეთ უსიამოვნო შეგრძნებებისგან.
ვარჯიშების შესასრულებლად დაგჭირდებათ სავარჯიშო მატი და კომფორტული ტანსაცმელი, რომ არ დაკარგოთ თავისუფლების შეგრძნება.
თითო მოძრაობას ვუთმობთ 60 წამს. ხერხემლის ვარჯიშები რეკომენდირებულია შეასრულოთ დილის ან საღამოს საათებში, სურვილისამებრ.
მოძრაობა პირველი
გამართული შეერთებული ფეხებით ჯდებით მატზე, მოვხარეთ მარჯვენა მუხლი და გადააბიჯეთ მარცხენა თეძოს. დადგით ტერფი მატზე. მაქსიმალურად წაიღეთ ტორსი მარჯვნივ და მარცხენა იდაყვით შეეხეთ მუხლს. ვჩერდებით ამ პოზიციაში 30 წმ და ვიმეორებთ მეორე მხარეს.
მოძრაობა მეორე - მუხლი გულმკერდთან დაწოლილ მდგომარეობაში
დაწექით ზურგზე, შეეცადეთ მაქსიმალურად გასწორდეთ და მთლიანი სხეულით შეეხოთ იატაკს, ფეხები გამართული და შეერთებულია. მოხარეთ მარჯვენა ფეხი, ხელებით გააკეთეთ ბოქლომი და მოქაჩეთ გულმკერდისკენ. გახსოვდეთ მეორე ფეხი არის ყოველთვის გამართული და არ შორდება იატაკს, ასევე შეეხეთ იატაკს თავით, ბეჭებით, ზურგით და ორივე თეძოთი. ეს მოძრაობა გავიმეოროთ 30 წამი ორივე მხარეს. ის მოგიხსნით დაღლილობის და ტკივილის შეგრძნებას ხერხემლის და წელის არეში.
მოძრაობა მესამე
ისევ ვწვებით ზურგზე, იატაკს მაქსიმალურად შეეხეთ: ზურგით, მხრებით, კისერით და თავით. აწიეთ გამართული ფეხები ზემოთ, გაშლილი მხრების სიგანეზე. გააკეთეთ სწორი კუთხე (90°) ფეხებსა და ტორსს შორის. შიგნიდან ხელის გულები მოკიდეთ ქუსლებს და ნელნელა ამოსუნთქვასთან ერთად მოქაჩეთ მუხლები მხრებთან. გულმკერდი გახსნილია და ვიყურებით ზემოთ. გახსოვდეთ თავი, კისერი და მხრები არ შორდება იატაკს. ჩერდებით ამ პოზიციაში 60 წამი. ეს ვარჯიში ძალიან კარგია ზურგის კუნთების მოსადუნებლად.
ქეთი ხატიაშვილი
