სრულფასოვანი ცილის უმთავრესი წყარო ნებისმიერი სახის ხორცია, რომელიც სრულად შეიცავს შეუცვლელ ამინომჟავებს და ამიტომ ბავშვთა კვებისათვის ის აუცილებელ პროდუქტს წარმოადგენს. ხორცის დამატება კვებით რაციონში 6 თვის ასაკის შემდეგ ხდება.
სრულყოფილი ცილების გარდა ხორცი B12 ვიტამინს და რკინას შეიცავს, რაც ანემიის პროფილაქტიკისათვის სჭირდება პატარას, რომლის ორგანიზმში დედისაგან ორსულობის დროს გადასული რკინის მარაგი 6 თვისათვის პრაქტიკულად ამოწურულია.
აი, დაახლოებით, რა რაოდენობის ხორცი უნდა მისცეთ ბავშვს მისთვის საჭირო ცილის მისაღებად: 7-8 თვის ასაკში -20 გრამამდე, 8-12 თვემდე - 40-50 გრ, 1-2 წელი-60-70 გრ, 2-3 წ -80-90 გრ, 3-5 წელი - 100 გრამი. 6-9 წ - 110-140 გრ, 10-13წ -140-170 გრ, 14-17 წ - 200-220 გრ.
შეუცველელი ამინომჟავების მარაგისათვის სადილად ხორცი ან თევზი- ეს სრულფასოვანი ცილოვანი საკვები კვირაში 4-5-ჯერაა რეკომენდებული.
მცენარეული ცილების მიცემა პატარასათვის პარკოსნების - ლობიოს, ოსპის, ბარდის საშუალებით შეგიძლიათ. მცენარეული ცილებით მდიდარია ასევე ისპანახი, ქინოა, თხილეული და თესლეული.
1 წლის ასაკის ზემოთ ცილის მიცემა სხვადასხვა სახით შეგიძლიათ - საუზმედ მარცვლეულის ფაფას თხილეული ან თესლეული დაამატეთ, კვერცხი საუზმედ ასევე იქნება ცილის წყარო, ხემსად კარგი იდეაა, მაგალითად, ჰუმუსი უმი ბოსტნეულით, პერიოდულად კი პარკოსნებიც შესთავაზეთ. რაციონში, ხორცთან ერთდ, აუცილებლად შეიტანეთ რძე და რძის პროდუქტები, როგორც ცილის და კალციუმის საუკეთესო წყარო.
ჯანმრთელობას ვუსურვებ თქვენს პატარებს!
