რა საფრთხის წინაშე შეიძლება აღმოვჩნდეთ, თუ რძის პროდუქტებს სრულად ამოვიღებთ რაციონიდან?

რძის პროდუქტები კალციუმის ერთ-ერთი მთავარი წყაროა, რომელიც აუცილებელია ძვლებისა და კბილების ჯანმრთელობისთვის. ეს მინერალი ასევე მონაწილეობს კუნთების, ნერვული სისტემისა და გულის ნორმალურ მუშაობაში. კალციუმის ნაკლებობამ შეიძლება გამოიწვიოს ოსტეოპოროზი, განსაკუთრებით ქალებში, და გაზარდოს ძვლების მოტეხილობის რისკი.

თუ რძის პროდუქტებს გამორიცხავთ, კალციუმის დეფიციტის ასანაზღაურებლად უნდა მიიღოთ კალციუმით გამდიდრებული მცენარეული ალტერნატივები (მაგალითად, ნუშის, სოიოს ან ქოქოსის რძე) და კალციუმის შემცველი პროდუქტები: მუქი მწვანე ბოსტნეული, ბროკოლი, ნუში, ჩიას თესლი და ტოფუ.

რძის პროდუქტები, განსაკუთრებით რძე და ყველი,  D ვიტამინის შესანიშნავი წყაროა, რომელიც აუცილებელია კალციუმის ათვისებისთვის და იმუნური სისტემის მხარდაჭერისთვის. ვიტამინი D გამომუშავდება კანის ქვეშ მზის სხივების ზემოქმედებით, მაგრამ ზამთარში მისი რაოდენობა შესაძლოა არასაკმარისი იყოს. D ვიტამინის ნაკლებობამ შეიძლება გამოიწვიოს ძვლების დასუსტება, დაღლილობა და იმუნიტეტის დაქვეითება.

რძის პროდუქტები, როგორიცაა მაწონი, ხაჭო და ყველი, მნიშვნელოვანი ცილების წყაროს წარმოადგენს. მათი სრულად გამორიცხვისას შესაძლებელია, რომ ორგანიზმმა ვერ მიიღოს საკმარისი ცილები, რაც გავლენას მოახდენს კუნთოვანი მასის ზრდასა და აღდგენაზე, იმუნური სისტემის ფუნქციონირებასა და ზოგად ჯანმრთელობაზე.

მაწონი, იოგურტი, აირანი, კეფირი და სხვა ფერმენტირებული რძის პროდუქტები მდიდარია პრობიოტიკებით – სასარგებლო ბაქტერიებით, რომლებიც ნაწლავის ჯანმრთელობას უწყობენ ხელს. მათმა გამორიცხვამ შეიძლება მიკროფლორის ბალანსის დარღვევა გამოიწვიოს, რაც გავლენას მოახდენს საჭმლის მონელებასა და იმუნურ სისტემაზე. პრობიოტიკები ეხმარება ანთების შემცირებას, საჭმლის მონელების გაუმჯობესებას და განწყობაზე ზემოქმედებასაც კი.

რძის პროდუქტები ვიტამინი B12-ის ერთ-ერთი წყაროა, რომელიც აუცილებელია ნერვული სისტემის ფუნქციონირებისთვის და სისხლისწარმოქმნის პროცესისთვის. მას შეიცავს ყველი, განსაკუთრებით შემდეგი სახეობა: სულგუნი, მოცარელა, ფეტა და პარმეზანი.  რძის პროდუქტების გამორიცხვის შემთხვევაში, B12-ის ნაკლებობის რისკი იზრდება, განსაკუთრებით ვეგანებისთვის, რადგან ეს ვიტამინი უმეტესად ცხოველურ პროდუქტებში გვხვდება. B12-ის დეფიციტმა შეიძლება გამოიწვიოს ანემია, დაღლილობა, ნევროლოგიური დარღვევები და კოგნიტიური ფუნქციების დაქვეითება.

ამ ვიტამინის ნაკლებობის თავიდან ასაცილებლად, მნიშვნელოვანია მიიღოთ გამდიდრებული მცენარეული პროდუქტები ან B12-ის საკვები დანამატები.

 თუ რძის პროდუქტებს რაციონიდან სრულად ამოიღებთ, აუცილებელია, რომ ამ ნივთიერებების მიღება სხვა პროდუქტებით დააბალანსოთ, რათა თავიდან აიცილოთ დეფიციტის პრობლემები.